RESCIESA

ALPE DE RASCIESA

L'Alpe Rasciesa fa parte del parco natural Puez-Odle, a xe situà a nord de Ortisei e da qua ghe xe na vista stupenda verso l'Alpe de Siusi, e Odle, a Val Gardena e a Vale Isarco.

SENTIERO CONSIGLIA'

L'itinerario che proponemo xe semplice sensa nesuna dificoltà particolare e Ve permetarà de caminar longo tutto l'Altipian.
Ciapada a segiovia Ortisei/Rasciesa se riva al Ristorante Rasciesa, da qua ciapé el sentiero verso el Rifugio Rasciesa (deso come deso in faxe de restauro) e à Cièsa de Santa Croxe. Rivai ala cièsa, ghe xe l'unico strapo del percorso, na saita che ve porta ala bela statua del Cristo sula ponta dela sima de Rasciesa de Fora. Meteve un atimo in sesto dopo sta fadiga e godeve el panorama e podopo ciapé el sentiero verso est chel core lungo a parte alta de l'Altipian e da qua ndée verso Malga Saltner Cason che ga na bea vista soe Odle. Podée sostare sui prà de fronte la malga opure magnar la rento speciaità tirolesi. Na volta rancurai ciapé el sentiero verso el Ristorante Rasciesa e da qua atraverso a Segiovia tornèe a Ortisei.
Dificoltà: minima Tempo de percorensa: 3 ore (soste comprese).