ALTIPIAN DELA PAGANELA E LAGO DE MOLVENO

L'ALTOPIAN E I PAEXI

Un distreto turistico un mucio vanti sia par el turismo invernae che estivo e un posto dove poder vedar panorami veramente bei co e Dolomiti de Brenta da na parte e a Val de l'Adèxe da chealtra. L'ambiente naturale xe sicuramente a major atrativa dea xona grasie ala vicinansa del Parco Naturale Adamelo Brenta onde se pol vedar dei esemplari de orso bruno alpin in libertà, ai tanti sentieri che i incontenta sia el treker esperto che queo ae prime armi e a stesa roba la val par i amanti dea mountain bike che qua i pol divertirse in decine de percorsi. D'Inverno sto posto deventa a patria del si alpin sopratuto tra Fai dea Paganela e Andalo. Infine ghe xe l'oferta de svago dele moderne struture; una fra tute el Centro sportivo de Andalo co campi da baeon, palavolo, basket, pisine...e no xe finia qua. Forse non xe un caso che a nasionale americana de si e tante squadre de baeon importanti e gapia scelto posto come base par i so ritiri. Ve ricordemo che nela scelta del'albergo xe mejo che privilegié uno de quei convensionai co a Andalo Card che ve consentirà de poder otegnar tuta na serie de sconti par funivie, pisine, negosi, e par tante altre atrative dea xona.

Andalo - Giro dei Maxi

Sto percorso el ga origine dala storia del paexe de Andalo che se ga svilupà torno dei maxi costruii da dei coloni proveniente dal Banale che i rivò qua par sfrutar a richesa de legname del logo. El giro scumisia visin ala Casa Cantoniera e prosegue par Maxo Ghezzi, quindi Maxo Cadìn, Maxo Pegorar, el va torno al lago de Andalo e vanti par Maxo Fovo. Dopo ver tocà Maxo Doss, Maxo Bortolon e Maxo Toscana (el pi vecio), se traversa a xona paludoxa de Palù, ramai piena de case, Maxo Monech (vista sul Brenta), Maxo Melchiori che se verxe sui prà soto el Monte Gaggia, Maxo Perli e se finise a Maxo Ponte.
Dificoltà: medio-basa (un pò longo 7km) Tempo de percorensa: 2,30 h

Andalo - Sentiero par Molveno

Dal paexe de Andalo (Piasa Dolomiti) se va vanti par la strada principale in diresion Molveno tegnendo a sanca fin a rivar dove scumisia el sentiero par Molveno (ghe xe na tabea co l'indicasion "Molveno").Vanti par sto sentiero acompagnai dal rumor dele acque del Rio Lambin. El percorso no xe difisie ma se ga piovuo da poco alcuni trati podaria esar impantanai. Rivai a na strada sterada se prosegue fin a rivar a na strada forestale visin na radura. Adeso mantegnendo el sentiero de drita se guadagna na poxision panoramica che da sul lago de Molveno e da qua se va xo fin al lago Bior e al paexe de Molveno.
Dificoltà: minima Tempo di percorensa: 1,30 ore

Parco Naturale Adamello Brenta - Sentiero dei Tre Rifugi

El nome de sto sentiero me lo so inventà mi parchè le un percorso che go creà mi par poder visitar i rifugi Pradel, Montanara e el Croz dell'Altissimo. Se ciapa la segiovia de Molveno che la porta al Rifugio Pradel. Da qua se va verso drita e suito se segue el traciato dele piste da si fin a rivar a Malga Tovre onde se pol vedar la lavorasion del late e comprar dei prodoti fati qua (formajo, buro, ricota). Se prosegue atraverso a strada forestale seguendo el traciato de naltra segiovia fin a rivar al Rifugio Montanara che el ga na area xughi par putei e dove se pol magnar caciagione. Dopo na breve pauxa se scumisia l'escursion verso el Rifugio Croz dell'Altissimo, seguendo el sentiero grote (n. 340bis e podopo el n. 340). Il tragito non xe ben segnalà e ve consigliemo de portarve drio na piantina dei sentieri e de ricordarve che el sentiero le in discesa a parte alcuni brevi trati in salita. Pasando tra boschi e fore rociose e godendo el stupendo scenario dele Dolomiti de Brenta in circa un'oreta e mexa se riva al Rifugio Croz dell'Altissimo situà ai pié dell'omonima sima. Qua nialtri vemo magnà un bonisimo spesatin co poenta e funghi. El ritorno lo faxé ciapando el sentiero che va verso Molveno (n. 322 e podopo n. 319) che seguendo el corso del Rio Mosso ve porta ala Baita Ciclamino (bar) e podopo al paexe in sirca do ore.
Dificoltà: media (atension al sentiero tra Rifugio Montanara e Croz del'Altisimo Tempo de percorensa: 5 ore

Spormaggiore - El Parco dei Orsi

L'Area Orsi de Spormagiore ve da la posibilità de vedar da visin l'orso bruno, el mamifero pi grando dele alpi, che xe tornà a popolar sti boschi grasie a un indovinà programa de reintrodusion. Qua podaré amirar in un ambiente naturale 3 esemplari che vive al'interno de un'area de 7.000mq. El complesso, xè dotà de quatro tane artificiali par el ricovero xornaliero e el svernamento. Da qualche ano xe sta avià l'ampliamento del parco che presto ospitarà altre specie alpine cofà el lupo e la linse.